Kapuso Stars

Humingi na ng dispensa ang SexBomb Girl na si Sunshine Garcia sa mga nakalaban nitong sina Alyssa Alano at John Feir (Belli Flori) sa game show ng GMA-7 na Gobingo dalawang linggo na ang nakararaan.

Kamakailan lamang ay napabalitang may tampuhan sa pagitan nina Sunsine at Alyssa dahil sa pangakong paghahatian na lamang ang premyo kung sinuman ang manalo sa kanilang tatlo. Ngunit hindi ito nangyari dahil ang nanalong si Sunshine ay walang ideya na hindi pala papayag ang kanyang manager na si Joy Cancio kahit na naka-oo na siya kina Sunshine at John.

Napanalunan ni Sunshine ang P164,000 prize money nang mag-head-to-head sila nina Alyssa at John sa Gobingo.

Ayon sa taped interview ni Sunshine sa Showbiz Central kahapon, May 18, "Pagdating ko pa lang ng Gobingo, nag-uusap na pagdating ko ng dressing room, nag-uusap na si Alyssa at saka si Kuya John Feir. Ngayon sabi nila, ‘O, ano, hatian na lang 'to. Parang ganito.' ‘O, sige, kayong bahala,' parang ganun ako, e."

Nang makuha ni Sunshine ang jackpot, nalaman ng dancer na kailangan niya munang ipaalam ito sa Focus Entertainment, ang production company ng talent manager na si Joy.

Pahayag ni Sunshine, "Noong nakuha ko na yung jackpot, pinuntahan na ako ni Alyssa, sabi niya, ‘Kumusta?' Sabi ko, ‘O, kuha yung jackpot.' Pero sabi ko, ‘Kailangan ko muna itong padaanin sa office [Focus Entertainment].' Noong sinabi ko nga dito, ayaw nga po nila pumayag."

"WALANG PROBLEMA." Sa StarTalk noong nakaraang Sabado, May 18, halos mapaiyak si Alyssa dahil sa mga anonymous comment na nakukuha niya na umano'y nagsasabing "mukha pera" siya.

Mangiyak-ngiyak na sinabi ni Alyssa sa StarTalk, "Sabihin na po nilang tanga ako, huwag lang mukhang pera. Kasi ano, e, pinaghihirapan ko naman po yung kinikita ko, hindi po ako humihingi sa ibang tao."

Sa hiwalay na taped interview ng Showbiz Central, inihayag din ni Alyssa na walang kaso sa kanya kung hindi siya mabigyan ng parte mula sa napanalunang pera ni Sunshine.

Ayon sa sexy comedienne host, "Yun pong pinapag-usapan namin na hati-hati, um-okay naman siya [Sunshine]. So okay, alam naman namin na hati. E, pero since naman nagkaproblema nga, hindi niya alam na hindi pala puwede kasi, di ba, may manager pa siya?"

Dagdag niya, "Yun, nag-a-apoligize nga siya na hindi niya raw kami mahahatian. Sinabi pa nga niya sa akin na, ‘Pasensiya na.' Hindi daw niya alam na ganun. Sabi ko, ‘Okay lang.' Sabi ko, ‘Walang problema doon.' So, hindi ko po alam kung saan nanggaling yung mukha akong pera, na naghahabol daw ako."

Bukod dito, ipinaliwanag din ni Alyssa na wala siyang pinatatamaan sa naging pahayag ni Lolit Solis noong Sabado sa StarTalk. Sinabi kasi ni Lolit, "Hati-hati sila, di ba, noong ibang kasali? Sabi ko, ‘Baka hindi tuparin, kailangan pilitin mo.' Sabi niya [Alyssa], ‘Hindi bale, 'Nay, kung ayaw niyang tuparin yung kanyang word of wisdom.'"

Paliwanag ni Alyssa, "Ay, hindi po, kasi nagbibiruan kami ni Nanay [Lolit]. Since may nagkuwento kay Nanay [Lolit], yung word of wisdom na yun, ‘Hindi bale, 'Nay, siguro may word of wisdom naman siya, bibigay naman niya yun.' Gumanun ako, pero hindi yun para patamain yung kung sinuman."

"NA-BYPASS AKO." Kasunod nito, nagpaliwanag na rin ang talent manager ni Sunshine na si Joy Cancio, na umaming nasaktan sa agarang pagpayag ng alaga sa paghahati-hati sa magiging prize money nang hindi siya kinukunsulta.

Ipinaliwanag ng talent manager ang kanyang pagtutol sa paghahati-hati ng prize money. Aniya, "Kasi it's a game show, di ba? E, ngayon, sabi ko, ‘Hindi ako papayag.' Kasi, unang-una, ako yung manager, ako yung nakipag-usap sa show, di ba?

"At the same time, as a manager niya [Sunshine], di ba, usually we get 30 percent. Kaso, since honorarium 'yon, hindi na namin kinukunan yun kasi kung matalo, maliit lang naman yun, di ba?

"Pero ang usapan namin ever since, we will get 30 percent from the prize. E, so from then on, kinompyut ko sa kanya [Sunshine], ‘O, kita mo, heto ang matitira sa 'yo. O, magkano na ngayon ang matitira sa 'yo kapag hinati-hati?'"

Hindi rin naitago ni Joy ang pagkadismaya sa naging desisyon ni Sunshine.

"Ang ikinagagalit ko sa kanya is, ‘I'm your manager, bakit binypass mo ako?' Actually, hindi sama ng loob yun, e. Kumbaga, ako yung nakakatanda, e, pinaiintindi ko sa kanya. Pinagalitan ko siya. Kumbaga, deserving naman siya na manalo kasi nga pinahirapan siya, di ba?"

Paglilinaw din ni Joy, "Ayaw ko kasing may nagagalit din sa kanila. Hindi nating masasabing matured enough na sila, e. Nakukulangan sila ng parang advice, guidance. Kaya sabi ko, kailangang mag-isip muna ng ilang beses bago magdesisyon para hindi magkamali."

SUNSHINE APOLOGIZES. Aminado naman ang SexBomb dancer na si Sunshine sa kanyang pagkakamali.

"Alam ko mali ako. Mali ako sa pag-oo kaagad. Mali ako sa bigla kong pagdedesisyon, na hindi ako nagkonsulta, hindi ako nagtanong," sabi niya.

Dahil dito, humingi rin si Sunshine ng paumanhin sa kanyang manager gayundin sa mga nakalaban niya sa Gobingo na sina Alyssa at John.

"Nagkausap na kami ni Ate Joy," sabi ni Sunshine. "'Yon nga yung sinabi niya sa akin na hindi puwede. Kailangan dumaan muna dito. At sinabi ko naman sa kanila, kina Kuya John at Alyssa, na bibigyan ko pa rin naman sila ng balato."

"Gusto kong sabihin kina Kuya John at Alyssa na, ‘Sorry talaga.' Sorry din ako sa Focus na na-by ass ko nga po sila."