Final 6 of 'StarStruck' prepare for the Final Showdown
Pare-parehong inihanda ng Final 6 ng StarStruck: The Next Level na sina Aljur Abrenica, Kris Bernal, Prince Stefan, Jewel Mische, Mart Escudero, at Rich Asuncion ang kanilang sarili na baka matanggal sila sa final elimination last Sunday, March 11 sa GMA Broadway Studio. Ito ang dahilan kaya halos iisa ang sagot nila nang makausap sila ng PEP (Philippine Entertainment Portal) sa Oasis Restaurant pagkatapos ng elimination: "Hindi ko po in-expect na makakapasok ako."
PRINCE STEFAN. Masaya si Prince na nakapasok siya dahil the next day, paalis sila para sa mall show nila sa Davao. Sa wakas daw ay makikita na rin niya ang Mama niya na doon na pala nakatira sa Davao kasama ang bago nitong pamilya.
Kung siya ang papipiliin, gusto niyang Ultimate Hunk ang makuha niyang titulo dahil wala na raw ang ka-loveteam niyang si Jesi Corcuera. Kung sa loveteam daw kasi, sina Kris at Aljur ang pwedeng manalo dahil sila naman daw talaga ang pinagtatambal. Pero okay lang din kay Prince kung si Jewel ang maka-loveteam niya.
ALJUR ABRENICA. Masayang-malungkot naman si Aljur. Masaya raw siya dahil kahit papaano, makakahinga na siya nang maluwag at inihahanda na rin niya ang sarili niya kung sakaling hindi siya ang manalo sa Final Showdown sa March 25. Malungkot daw siya dahil naaalaala niya ang pagsasamahan nila ng mga finalists.
Sinabi rin ni Aljur na okay raw sa kanya kung sila ni Kris ang mananalong Ultimate Loveteam. Nilinaw ng binata na hindi pa raw niya nililigawan si Kris, pero nagpaparamdam na raw siya rito.
RICH ASUNCION. Naranasan na ni Rich ang matanggal, kaya hindi na siya masyadong ninerbiyos habang hinihintay kung sino sa kanila ni Stef Prescott ang tatawagin para makabilang sa Final 6. Mas ninenerbiyos pa nga raw siya ngayon dahil bilang isang probinsiyana, hindi siya sanay humarap sa napakaraming tao, tulad ng nangyayari sa mga mall shows nila ngayon.
JEWEL MISCHE. Naiyak naman si Jewel nang hindi makapasok si Paulo Avelino na ka-loveteam niya. Inamin din ni Jewel na nagpaparamdam na rin sa kanya ng special affection si Paulo, pero mga bata pa raw sila kaya dapat career muna bago lovelife ang atupagin nila.
Nalaman din namin na pagkatapos ng show, ilang beses tinext ni Jewel si Paulo, pero hindi raw siya sinagot nito. Masamang-masama raw kasi ang loob ni Paulo sa kanyang pagkatalo.
MART ESCUDERO. Kinukulit naman ni Mart si Kris nang sabay silang makausap ng PEP. Crush kasi ni Mart si Kris, pero ayaw raw niyang ituloy ang panliligaw rito dahil alam niyang sina Aljur at Kris na ang magka-loveteam. Si Stef ang ka-loveteam ni Mart kaya hindi raw niya matingnan ang dalaga na umiiyak pagkatapos hindi makapasok sa Final 6.
Maging si Mart ay inakala na si Paulo ang makakapasok sa Final 6 dahil feeling niya, pumapangalawa lamang siya rito. Sa Ultimate Hunk daw niya gustong manalo, pero inihahanda rin daw niya ang sarili niya kung sakaling hindi siya manalo.
KRIS BERNAL. Happy and blessed naman si Kris dahil inihanda na niya ang sarili niya na hindi makakapasok sa Final 6. Ito raw ang dahilan kaya napaiyak siya sa nerbiyos at tuwa nang tawagin ang pangalan niya.
Takot na takot din daw siya nang nagsasayaw siya dahil nanginginig ang kanyang mga binti. Okay lang daw sa kanya kung sila ni Aljur ang mananalong Ultimate Loveteam.
ONE MILLION. Bago ang pagpili sa Final 6, nakausap namin sila habang nagpi-pictorial. Tinanong namin sila kung ano ang gagawin nila sakaling sila ang manalo at makatanggap ng one million cash prize.
Ayon kay Prince, itutulong niya sa charity ang iba. Ipagagamot din daw niya ang ilong ng Mama niya na matapos iparetoke 12 years ago ay lumaki na ang buto sa ilong nito. May lumalabas din daw na parang maliliit na bigas na baka raw maging cancerous kung hindi maaagapan.
Gusto ni Kris na makabili siya ng sarili niyang kotse at ang iba raw ay ibibigay niya sa Mommy niya para panggastos sa bahay.
Gusto naman ni Jewel maging pilot at doon daw niya uubusin ang kanyang P1 million.
Itutulong naman ni Rich ang pera niya sa pagpapatapos ng pag-aaral ng tatlo niyang nakababatang kapatid at mga pinsan sa Bohol.
Si Mart, na kamag-anak pala ni senatoriable Chiz Escudero, ay sinabing 20 percent ng P1 million ay itutulong niya sa Pediatric Ward ng Philippine General Hospital dahil nakita niya ang kakulangan ng gamit doon nang ma-confine siya noong nine years old pa lamang siya dahil sa typhoid.
Ipapahawak naman ni Aljur ang cash prize niya sa kanyang parents na medyo may edad na. Gusto rin niyang itulong sa pagpapaaral ng kanyang mga kapatid ang mapapanalunan niya.
Kahapon ay nasa Davao ang Final 6 for their Nationwide Invasion. Today, March 13, nasa Cebu sila at tomorrow, March 14, nasa Iloilo naman sila. Pagbalik nila ng Manila, mayroon silang final acting test at pagkatapos ay maghahanda na sila para sa Final Showdown on March 25.
SHARE THIS POST
