Kapuso Stars

Ipinagdiinan ni Katrina Halili na mas nauna siyang tumanggi na pumirma
ng kontrata sa GMA Artist Center. Hindi raw totoo na naimpluwensiyahan
lang siya ni Cristine, na lumipat na ngayon sa ABS-CBN.

"Hindi naman totoo na naimpluwensyahan ako ni Cristine kaya hindi na
ako pumirma ng panibagong kontrata sa Artist Center. Mas nauna talaga
ako sa kanya, kasi two years ago pa, ayaw ko na talagang pumirma.

"Actually, kahit kay Angel Locsin, mas nauna ako na umayaw sa pagpirma
sa Artista Center. Noon pa, gusto ko na talagang umalis.
"Ayoko po kasi nung minamanduhan at sinasabihan ako ng kung anu-ano.
At saka, binu-book nila ako kahit ayaw ko naman, na parang hindi ka
puwedeng tumanggi, na parang wala kang pahinga.

"May mga ibinigay sila sa akin na ayaw ko talaga. Like `yung isang
movie na pinag-go see nila ako. Hindi ko talaga ginalingan ang acting
ko para hindi ako makuha. Kasi nga ayoko nung
project na `yon.

"May mga nagsasabi na maarte raw ako o mapili ako sa trabaho. Hindi ko
sinasabing ang Artist Center ang nagpapalabas ng kuwento na `yon.
Pero, masakit kasi `yon sa akin.

"Kaya para wala na talagang problema, umalis na ako sa kanila.
"Ang hirap kasi ng sitwasyon ko noon. Na kapag may pinapupuntahan sila
sa akin, na hindi ako makahindi, tapos hindi mo alam kung ano ang
gagawin mo. Nakakapagod na rin pong mag-explain palagi.

"Kaya nga nung wala akong show noon, nagpahinga talaga ako. Hindi ako
tumanggap ng booking. In-enjoy ko talaga ang bakasyon ko.
"Pero in fairness naman with them, hindi naman nila ako pinabayaan,
marami akong booking noon. Napagod lang talaga ako.

"Pero kahit wala naman po ako sa kanila, puwede pa rin nila akong
i-booking or bigyan ng project," sabi ni Katrina.

Si Rommel Gacho ang bagong manager ni Katrina ngayon, at kuntento siya
sa pag-aalaga nito sa kanya.

"At least ngayon, kaming dalawa lang ni Iwa (Moto) ang hina-handle ni
Tatay Rommel.

"Atsaka, kahit naman noong nasa Artist Center pa lang ako, si Tatay
Rommel na ang hinihingian ko ng payo. Kumbaga, maganda ang samahan namin.

"Kay Tatay Rommel, kapag may project na ini-offer sa akin, tinatanong
muna niya ako kung gusto ko. Ini-explain niyang mabuti kung ano `yon.
"So, mas maganda `yon, dahil alam ko kung ano ang gagawin ko…" pahayag
ni Katrina.

Alam ni Katrina na posibleng mag-react o magalit ang Artist Center sa
mga sinabi niya ngayon. Kaya nilinaw agad ni Katrina na wala siyang
intensyong siraan o saktan sila.

Sabi nga ni Katrina, malaki ang utang na loob niya sa Artist Center.

(Rey Pumaloy)